పలనాడు జిల్లా వినుకొండలో నిర్వహించిన స్వర్ణాంధ్ర–స్వచ్ఛాంధ్ర కార్యక్రమంలో ముఖ్యమంత్రి నారా చంద్రబాబు నాయుడు పాల్గొని ప్రజలను ఉద్దేశించి ప్రసంగించారు. రాష్ట్రాన్ని పరిశుభ్రంగా, పచ్చదనంతో అభివృద్ధి చేయాలనే లక్ష్యంతో ఈ కార్యక్రమాన్ని 2025 జనవరిలో ప్రారంభించామని తెలిపారు.డిప్యూటీ సీఎం పవన్ కళ్యాణ్, మంత్రి నారాయణ ఆధ్వర్యంలో రాష్ట్రవ్యాప్తంగా పరిశుభ్రత కార్యక్రమాలు వేగంగా కొనసాగుతున్నాయని సీఎం చెప్పారు. ఇంటిని శుభ్రంగా ఉంచుకున్నట్లే గ్రామాలు, పట్టణాల వీధులు కూడా పరిశుభ్రంగా ఉండేలా ప్రతి ఒక్కరూ బాధ్యత తీసుకోవాలని పిలుపునిచ్చారు.గతంలో పేరుకుపోయిన భారీ చెత్త గుట్టల వల్ల భూమి, భూగర్భజలాలు మరియు వాతావరణం కలుషితమై ప్రజల ఆరోగ్యానికి ప్రమాదం ఏర్పడిందన్నారు. అందుకే చెత్త నిర్మూలనకు ప్రభుత్వం ప్రత్యేక చర్యలు చేపట్టిందని వివరించారు.మున్సిపాలిటీలలో ఎక్కువశాతం ప్రాంతాల్లో ఇంటింటికీ చెత్త సేకరణ జరుగుతోందని, గ్రామీణ ప్రాంతాల్లో కూడా త్వరలో పూర్తి స్థాయిలో డోర్ టు డోర్ కలెక్షన్ అమలు చేస్తామని తెలిపారు. ఇంటి వద్దే తడి చెత్తను కాంపోస్టుగా మార్చి మొక్కలకు ఉపయోగించుకోవాలని సూచించారు. ఇప్పటికే లక్షలాది కుటుంబాలు హోం కాంపోస్టింగ్ ద్వారా టెర్రస్ గార్డెనింగ్ నిర్వహిస్తున్నాయని పేర్కొన్నారు.ఘన వ్యర్థాలను శాస్త్రీయంగా ప్రాసెస్ చేసి చెత్త నుంచి సంపద, విద్యుత్ ఉత్పత్తి చేసే చర్యలు కొనసాగుతున్నాయని చెప్పారు. విశాఖపట్నం, గుంటూరులో చెత్త ఆధారిత విద్యుత్ ప్లాంట్లు పనిచేస్తుండగా, మరికొన్ని ప్రాంతాల్లో కొత్త ప్లాంట్లు ఏర్పాటు చేయడానికి చర్యలు తీసుకుంటున్నామని వెల్లడించారు.తడి-పొడి చెత్త వేరు చేసే విధానాన్ని ప్రోత్సహిస్తున్నామని, సింగిల్ యూజ్ ప్లాస్టిక్పై నిషేధం అమలు చేస్తున్నామని తెలిపారు. చెత్త నిర్వహణలో ప్రజల ఆలోచనా విధానం మారాల్సిన అవసరం ఉందని, పరిశుభ్రత విషయంలో అభివృద్ధి చెందిన దేశాల తరహాలో అలవాట్లు పెంపొందించుకోవాలని సూచించారు.తడి వ్యర్థాల వల్ల మలేరియా, డెంగ్యూ, డయేరియా వంటి వ్యాధులు వ్యాపించే ప్రమాదం ఉందని సీఎం హెచ్చరించారు. పరిశుభ్రమైన రాష్ట్ర నిర్మాణంలో ప్రజల భాగస్వామ్యం అత్యంత కీలకమని ఆయన అన్నారు.
